2,5% verkfræðinga misstu vinnuna

Um 2,5% félagsmanna í Verkfræðingafélagi Íslands misstu vinnuna í kórónuveirufaraldrinum.
Um 2,5% félagsmanna í Verkfræðingafélagi Íslands misstu vinnuna í kórónuveirufaraldrinum. mbl.is/Eggert Jóhannesson

14% félagsmanna í Verkfræðingafélagi Íslands fóru í hlutastarf vegna kórónuveirufaraldursins og um 2,5% félagsmanna misstu vinnunna. Rúmlega þriðjungur vinnuveitenda félagsmanna nýtti sér hlutabótaleið stjórnvalda. 

Verkfræðingafélag Íslands lét gera könnun á stöðu félagsmanna á tímum heimsfaraldurs kórónuveiru. Könnunin var gerð dagana 10. júní til 4. júlí og var svarhlutfall um 38,8%. 

Fram kemur í könnuninni að tæplega 81% félagsmanna hafi ekki orðið fyrir tekjuskerðingu. Grunnlaun lækkuðu hjá 5,7% og 4,8% nefndu minni yfirvinnu sem skýringu á skertum tekjum. 

Ríflega 83% félagsmanna unnu fjarvinnu að einhverju leyti, en fjarvinna var vegna fyrirmæla vinnuveitenda hjá 30% þátttakenda. Tæpum 60% fannst auðvelt að uppfylla vinnuskyldu í fjarvinnu. 

mbl.is