Gert er ráð fyrir að skóla- og frístundastarf í Reykjavík hefjist 24. ágúst með hefðbundnum hætti, en undirbúningur fyrir haustið er í fullum gangi.
Grunnskólum í Reykjavík fjölgar þetta haustið úr 36 í 38.
Þrír nýjir skólar taka nú til starfa í norðanverðum Grafarvogi í stað tveggja áður. Áður voru þar Vættaskóli og Kelduskóli en verða frá og með hausti Borgaskóli, Engjaskóli og Víkurskóli sem er nýsköpunarskóli á Unglingastigi.
Þá mun Háaleitisskóli, sem var rekinn á tveimur starfsstöðvum skiptast í tvo skóla, Álftamýrarskóla og Hvassaleitisskóla.
Óvenjumargir nýir skólastjórnendur hefja störf í grunnskólum borgarinnar þetta haustið.
Arnheiður Helgadóttir er nýr skólastjóri Klettaskóla en hún starfaði áður sem verkefnastjóri sérkennslu á skóla- og frístundasviði borgarinnar.
Árný Inga Pálsdóttir er nýr skólastjóri Borgaskóla en hún var áður skólastjóri Kelduskóla.
Álfheiður Einarsdóttir er nýr skólastjóri í Engjaskóla en hún var áður aðstoðarskólastjóri í Vættaskóla.
Berglind Stefánsdóttir er nýr skólastjóri í Hlíðaskóla en hún starfaði síðast sem skólastjóri Ål folkhögskole í Noregi.
Dagný Kristinsdóttir verður skólastjóri í Hvassaleitisskóla en hún starfaði síðast sem framkvæmdastjóri kennslu og þjónustu við Háskólann á Bifröst.
Helgi Gíslason er nýr skólastjóri í Fellaskóla en hann hefur verið aðstoðarskólastjóri þar síðastliðin ár.
Rósa Harðardóttir tekur við stjórnartaumum í Selásskóla en hún starfaði áður sem verkefnastjóri við skólann.
Þuríður Óttarsdóttir er nýr skólastjóri í Víkurskóla en hún stýrði áður Vættaskóla.