Smitum fækki hægt og bítandi

Thor Aspelund, prófessor í líftölfræði við HÍ fer fyrir rannsóknarteyminu …
Thor Aspelund, prófessor í líftölfræði við HÍ fer fyrir rannsóknarteyminu sem vinnur að gerð spálíkansins. Ljósmynd/Lögreglan

Útlit er fyrir að innanlandssmit kórónuveiru haldi áfram að greinast nær daglega út þennan mánuð og inn í fyrstu viku septembermánaðar, ef marka má nýja spá vísindamanna við Háskóla Íslands, embætti landlæknis og Landspítalann sem gefin var út í dag. Spáin nær til næstu þriggja vikna, eða til 4. september, en segir ekki til um þróunina þar eftir.  

Spálíkani, sem rannsóknarteymið hefur þróað, er þar beitt á fyrirliggjandi gögn um veiruna til að reyna að meta þróun faraldursins. Sett eru fram nokkur spábil, sem gefa líkur á því fjöldi nýrra tilfella verði innan tiltekinna marka. Þannig sýnir dekksta svæðið á grafinu hér að neðan 50% spábil. Af því má ráða að hvern dag sem spálíkanið nær til eru yfir helmingslíkur á að hér greinist nýtt innanlandssmit þótt þróunin sé niður á við. Næstu daga er gert ráð fyrir að helmingslíkur séu á að fjöldi virkra smita á dag verði á bilinu 1-4.

Hér má sjá spá fyrir þróun innlendra daglegra smita (að …
Hér má sjá spá fyrir þróun innlendra daglegra smita (að ofan) og uppsafnaðra innlendra smita (að neðan). Dekksta grafið sýnir 50% spábil, næstdekksta 60%, því næst 70%, 80%, 90% og 95%. Athugið að grafið sem er dekkst á myndinni er þó jákvæðasta þróunin þótt ætla mætti annað af litavali. Graf/HÍ

Í spánni er horft til annarrar bylgju faraldursins, sem miðað er við að hafi hafist 23. júlí þegar smit greindist innanlands í fyrsta sinn í þrjár vikur. Síðan þá hafa 128 smit greinst innanlands.

Uppsafnaður fjöldi smita í annarri bylgju eftir þrjár vikur, þegar spánni sleppir, er líklegur til að vera um 150, en taldar eru 5% líkur á að fjöldinn fari yfir 300.  

Ekki er talið tímabært að spá fyrir um fjölda spítalainnlagna á þessum tímapunkti en ástandið verður áfram vaktað og bendi gögn til hraðari vaxtar kann þeirri spá að vera bætt við er líkanið verður uppfært eftir viku.

Ekki sami vöxtur og síðast

Í samantektinni er önnur bylgjan einnig borin saman við þá fyrstu en í báðum tilvikum er miðað við þróun frá því fyrsta innanlandssmit greindist. Það gerðist 4. mars í fyrstu bylgju, en 23. júlí í annarri, sem fyrr segir.

Líkt og sjá má á meðfylgjandi mynd líkist upphaf annarrar bylgju upphafi þeirrar fyrstu þótt rétt sé að taka fram að óvissan er mikil þegar tölur eru svo lágar. Hundrað manna samkomutakmörkun var innleidd á tólfta degi fyrstu bylgju, en áttunda degi þeirrar síðari og segir í samantektinni að þau skjótu viðbrögð geti haft áhrif á það að leiðir skilja milli bylgnanna tveggja eftir um tólf daga.

Samanburður á fyrstu og annarri bylgju, tímasett frá fyrsta innanlandssmiti …
Samanburður á fyrstu og annarri bylgju, tímasett frá fyrsta innanlandssmiti hvorrar bylgju (4. mars og 23. júlí). Graf/HÍ
mbl.is
Fleira áhugavert
Fleira áhugavert