Gagnrýnin á fullan rétt á sér
Veronika Steinunn Magnúsdóttir
Setja bókamerki
Þórdís Kolbrún Reykfjörð Gylfadóttir, atvinnuvega- og nýsköpunarráðherra, segir að forgangsatriði sé að vinna bug á kórónuveirufaraldrinum innanlands. Gagnrýni innan ferðaþjónustunnar eigi þó fullan rétt á sér, á tímum þar sem óvissa ríkir.
„Það er dýrara að loka starfsemi innanlands heldur en að loka allri ferðaþjónustu en við þurfum þó að horfa til þess hvort valið sé á milli þessara tveggja kosta og engra annarra,“ segir Þórdís í samtali við mbl.is.
Vill efnahagsgreiningu á sóttvarnaaðgerðum
Ráðherrann lagði minnisblað fyrir ríkisstjórnina á þriðjudaginn síðastliðinn, þar sem hún lagði áherslu á að unnið yrði að ítarlegri efnahagsgreiningu á sóttvarnaaðgerðum og lagt yrði heildstætt mat á þjóðhagslegan kostnað og ávinning af misströngum sóttvarnarreglum – annars vegar á landamærunum og hins vegar innanlands.
„Við höfum rætt minnisblaðið í ríkisstjórn og mitt hlutverk er auðvitað að koma þessum upplýsingum til ríkisstjórnarinnar, til þess að geta tekið þessa umræðu. Ég veit að þessi vinna er þegar farin af stað í stjórnkerfinu,“ segir Þórdís. Málið kalli á samspil milli ráðuneytanna.
Allir átti sig þó á alvarleika málsins; fyrir faraldur komu tugir farþegavéla til landsins sem nú eru orðnar örfáar á dag vegna þess ástands sem ríkir. Þrátt fyrir að flugbransinn beri þungt högg af sóttvarnaaðgerðum sé óvissan slík að ómögulegt sé að hafa nægilegan fyrirsjáanleika í ákvarðanatöku.
„Þessar aðstæður gera fólki í atvinnulífinu illmögulegt og stundum alveg ómögulegt að taka ákvarðanir, svo þau sjónarmið sem fram hafa komið frá atvinnulífinu hafa fullan rétt á sér,“ segir Þórdís.
„Staðreyndin er sú að aðstæður breytast hér innanlands og erlendis líka. Við sjáum að víða erlendis er smitum að fjölga. Allt hefur þetta áhrif og kallar á samspil í samgangna- og innanlandsstarfsemi, hvort sem það er á milli fyrirtækja, skóla eða menningarstarfsemi,“ segir hún.
Kostir í stöðunni eru í sífelldri skoðun hjá ríkisstjórninni og kallaði því ráðherra eftir dýpri greiningu á áhrifum mismunandi valkosta. Af því tilefni fjallaði Þórdís m.a. um mikilvægi gjaldeyristekna í Facebook-færslu sem birtist í dag.
„Þetta er auðvitað risastórt verkefni og kallar á mikla vinnu. Vonandi erum við að færast nær og nær skotmarkinu. En óvissan er enn þá mikil, því miður,“ segir Þórdís að endingu.
Sex hafa greinst með listeríu
Eyjafjarðarbraut lokað vegna alvarlegs umferðarslyss
„Umsátursástand“
Æskuvinur Íslendings myrtur í Noregi
Krefjast stöðvunar framkvæmda
Banna mengandi búnað sem leyfður er á Íslandi
„Það þarf að vinna mikinn fjölda upp“