Samkaup í skógi

Fulltrúar Samkaupa og Skógræktarfélag Íslands skrifuðu í gær undir samstarfssamning um verkefnið Opinn skógur.

Markmiðið með samstarfinu er að bæta aðstöðu og auka aðgengi á opnum skógræktarsvæðum í alfaraleið og miðla upplýsingum og fræðslu um lífríki, náttúru og sögu svo almenningur geti nýtt sér skógana til áningar, útivistar og heilsubótar. Með samningnum er rekstur verkefnisins tryggður á þessu ári og því næsta, auk þess sem unnið verður að kynningu á málinu.

„Við leitum stöðugt leiða til að lágmarka umhverfisáhrif af starfsemi okkar til að tryggja að komandi kynslóðir fái að njóta fegurðar og þess góða sem umhverfið okkar hefur upp á bjóða,“ segir Ingibjörg Ásta Halldórsdóttir, markaðsstjóri Samkaupa. Hún segir samstarf og stuðning við skógræktarfélagið falla vel að umhverfisstefnu Samkaupa enda gegnir félagið mikilvægu hlutverki í náttúru- og umhverfisvernd.

Opnir skógar eru nú sautján talsins, þeir eru víða um land og hvarvetna góð útivistaraðstaða. Unnið verður áfram að þróun og bættu aðgengi þannig að sem flestir landsmenn geti notið þeirra miklu gæða sem felast í skógunum sem eru allir opnir fólki. sbs@mbl.is