Lilja Ósk Snorradóttir, framkvæmdastjóri Pegasus, segir veikingu krónunnar hjálpa til við að fá erlend kvikmyndaver til að taka upp efni á Íslandi. Þá hafi útbreiðsla kórónuveirunnar haft mikil áhrif á eftirspurnina.
Þegar faraldurinn virtist að baki í sumar hafi áhuginn aukist en eftir að önnur bylgjan hófst hafi fyrirspurnum fækkað.
Kvikmyndafyrirtækið Pegasus var stofnað fyrir rúmlega 30 árum. Meðal verkefna félagsins á síðustu árum er framleiðsla á þáttum í Game of Thrones-seríunni vinsælu.
Lilja Ósk segir í samtali í ViðskiptaMogganum í dag, að nokkur samstarfsverkefni með erlendum kvikmyndaverum séu í farvatninu. Um þau gildi hins vegar trúnaður.
Hún segir áhorf á sjónvarp hafa stóraukist í faraldrinum og því sé auðvelt að fjármagna þáttagerð. Erfiðara sé fyrir sjálfstæða framleiðendur að fjármagna kvikmyndir við þessar óvenjulegu aðstæður.