Ríkissaksóknari hefur áfrýjað dómi héraðsdóms yfir karlmanni sem beitti kærustu sína grófu ofbeldi. Farið er fram á að dæmt sé eftir ákvæðum laga um ofbeldi í nánu sambandi, en við því eru harðari refsingar. RÚV greinir frá þessu.
Kamilla Ívarsdóttir, átján ára gömul stúlka, steig á dögunum fram og sagði frá grófu og ítrekuðu heimilisofbeldi sem þáverandi kærasti hennar beitti hana. Kamilla þríbrotnaði í andlitinu og er nú með gervibein í andlitinu.
Maðurinn var í mars dæmdur í tólf mánaða fangelsi fyrir brotin, en var sleppt lausum stuttu síðar eftir að hafa aðeins afplánað um fimm mánuði, stærstan part í gæsluvarðhaldi fyrir dómsuppkvaðningu. Þegar hefur verið greint frá því að maðurinn hringdi 122 sinnum í Kamillu úr fangelsinu, þrátt fyrir að hún hefði fengið nálgunarbann á hann.
Maðurinn hafði verið ákærður fyrir ofbeldi í nánu sambandi, en héraðsdómur féllst ekki á að um náið samband væri að ræða þar sem þau Kamilla voru ekki formlega í skráðir sambúð. Sem fyrr segir hefur saksóknari áfrýjað málinu til að fá því hnekkt og gerir kröfu um refsiþyngingu.