Umtalsvert fleiri skammtar af bóluefni gegn árlegri inflúensu verða í boði í haust en síðustu ár. Undirbúningur bólusetningar gegn inflúensunni er í fullum gangi en inflúensan er væntanleg upp úr áramótum, að sögn Kjartans Hreins Njálssonar, aðstoðarmanns landlæknis.
„Bóluefnið verður tilbúið til dreifingar í byrjun október og við búumst við inflúensunni upp úr áramótum. Það er erfitt að segja hver eftirspurnin eftir bóluefninu verður. Hún gæti orðið meiri en venjulega. Rúmlega 75 þúsund skammtar verða hér á boðstólum sem er umtalsvert meira en undanfarin ár,“ segir Kjartan í umfjöllun um málið í Morgunblaðinu í dag.