Fyrirferðarmikla hluti sem eiga ekkert erindi í grenndargáma á höfuðborgarsvæðinu er oft að finna við gámana.
Þegar verktakar á vegum Sorpu koma til að tæma gámana hafa þeir meðal annars rekist á bílhræ, bílvélar, eldavélar og önnur raftæki, rúm, sófasett, innréttingar og ruslapoka með blönduðum efnum, að því er fram kemur um hegðan þessa í Morgunblaðinu í dag.
Guðmundur Tryggvi Ólafsson, rekstrarstjóri endurvinnslustöðva hjá Sorpu, segir að umgengni sé ágæt á meginþorra grenndarstöðva, en nokkrar stöðvar þurfi mikla þjónustu og þurfi að hreinsa frá þeim daglega. Því miður dragi fólk oft hluti inn á þessar stöðvar sem eigi alls ekki heima þar og komist engan veginn í gámana. Nóg pláss sé hins vegar á endurvinnslustöðvunum.
Í síðustu viku voru grenndargámar á Eiðistorgi á Seltjarnarnesi fjarlægðir vegna slæmrar umgengni.