Um helgina er útlit fyrir rysjótt og vætusamt veður, einkum á sunnudag en þá er því spáð að kröpp lægð fari yfir landið með hvassviðri eða stormi og mikilli rigningu. Í kjölfar lægðarinnar kólnar og má jafnvel búast við snjókomu norðan heiða á mánudag.
Þetta kemur fram í hugleiðingum veðurfræðings.
„Þetta er lægð sem á að eiginlega æða yfir landið en það er erfitt að segja núna hversu lengi hún mun standa,“ sagði Haraldur Eiríksson, veðurfræðingur á Veðurstofu Íslands, í samtali við mbl.is í gærkvöldi.
Hann vænti þess þá að veðurviðvaranir yrðu gefnar út snemma í dag.
Austfirðingar og nágrannar þeirra geta þó notið lognsins á undan storminum en á austanverðu landinu verður léttskýjað og sæmilega hlýtt í dag. Vestan til verður skýjað og lítils háttar væta með köflum, en vaxandi sunnanátt og rigning seint í kvöld.