Í ljósi fjölgunar nýrra COVID-19 smita í samfélaginu hefur neyðarstjórn Hrafnistu tekið ákvörðun um að herða heimsóknarreglur á hjúkrunarheimilum frá og með deginum í dag.
Aðeins einn gestur má heimsækja hvern íbúa og heimilt verður að skipta um heimsóknargest á sjö daga fresti. Reglurnar verða endurskoðaðar eftir þörfum. Þetta kemur fram í bréfi sem sent var til aðstandenda.
Heimsóknarreglur eru eftirfarandi:
- Aðeins einn gestur má heimsækja hvern íbúa. Heimilt er að skipta um heimsóknargest á sjö daga fresti. Heimsóknartími er frá mismunandi milli heimila.
- Undanþága er aðeins veitt við mikil veikindi íbúa og þarf að fá leyfi vaktstjóra deildar.
- Viðkomandi gestur þarf að spritta hendur um leið og komið er inn, í upphafi heimsóknar.
- Við biðjum ykkur um að fara beint inn á herbergi til íbúans og ekki stoppa og spjalla á leiðinni. Ef íbúi er ekki inni á herbergi biðjið þá starfsfólk um að sækja hann, ekki gera það sjálf.
- Virðið 2ja metra regluna og forðist snertingu við íbúa eins og hægt er.
- Að heimsókn lokinni farið þá beint út án þess að stoppa og spjalla á leiðinni. Vinsamlegast sprittið hendur við brottför.
- Heimilt er að íbúi fari út í göngutúr/bíltúr með heimsóknargesti sínum en hitti ekki aðra á meðan þessar takmarkanir eru í gildi.
Þá eru gestir beðnir um að hafa eftirfarandi reglur í huga:
- Ekki koma í heimsókn ef þú ert í einangrun eða sóttkví
- Ekki koma í heimsókn ef þú ert að bíða eftir niðurstöðu úr sýnatöku.
- Ekki koma í heimsókn ef þú ert með flensueinkenni (kvef, hósta, höfuðverk, beinverki, þreytu, kviðverki, niðurgang o.fl).
- Ekki koma í heimsókn ef þú varst erlendis fyrir minna en 14 dögum.