Fulltrúar Sjálfstæðisflokks og Framsóknarflokks í nýju sameinuðu sveitarfélagi á Austurlandi, hafa ákveðið að taka upp formlegar viðræður með það að markmiði að mynda meirihluta í nýrri sveitarstjórn.
Þetta kemur fram í tilkynningu.
„Ákvörðunin er tekin í kjölfar óformlegra viðræðna þar sem farið hefur verið yfir helstu málefnaáherslur flokkanna og framtíðarsýn fyrir nýtt sveitarfélag. Að teknu tilliti til niðurstöðu þeirra viðræðna, þess trausts sem ríkir milli fulltrúa og sameiginlegrar reynslu þeirra af sveitarstjórnarmálum, þ.m.t. í aðdraganda sameiningar sveitarfélaganna, er ákvörðun um formlegar viðræður tekin. Fulltrúar flokkanna eru sammála um mikilvægi þess að málefnasamningur liggi fyrir sem fyrst og að breytingar í stjórnsýslu nýs sveitarfélags gangi fljótt og vel fyrir sig.“
Kosningar til sveitastjórnar fóru fram um síðustu helgi og fékk Sjálfstæðisflokkurinn fjóra fulltrúa kjörna, Austurlistinn þrjá, Framsókn tvo og Miðflokkurinn og Vinstri græn einn fulltrúa hvor.
Höfðu íbúar kosið í leiðbeinandi nafnakönnun um nafnið Múlaþing fyrir sveitarfélagið, en um er að ræða sameinað sveitarfélag Fljótsdalshéraðs, Djúpavogshrepps, Borgarfjarðarhrepps og Seyðisfjarðarkaupstaðar.
Niðurstöðurnar er ekki bindandi en ný sveitastjórn mun velja sveitarfélaginu nafn.
Fréttin hefur verið uppfærð