Jöfnunarsjóður sveitarfélaga mun úthluta 200 milljónum króna til viðbótar í ár vegna þjónustu til fatlaðs fólks. Byggir úthlutunin á gögnum sem safnað var frá þjónustusvæðum og er í samræmi við fyrirhugaða aðkomu Jöfnunarsjóðs sveitarfélaga að vinnu viðbragðsteymis stjórnvalda um þjónustu við viðkvæma hópa.
Sigurður Ingi Jóhannsson, samgöngu- og sveitarstjórnarráðherra samþykkti tillögu ráðgjafanefndar Jöfnunarsjóðs um að úthluta viðbótarframlaginu þann 25. september síðastliðinn. Viðbótarframlaginu er ætlað að koma til móts við aukinn kostnað þjónustusvæða vegna kórónuveirufaraldursins.