Lífslíkur kvenna nánast tvöfaldast

Bleika slaufan í ár er hönnuð af Guðbjörgu Ingvarsdóttur, skartgripahönnuði …
Bleika slaufan í ár er hönnuð af Guðbjörgu Ingvarsdóttur, skartgripahönnuði í Aurum.

Bleika slaufan árvekni- og fjáröflunarátak Krabbameinsfélags Íslands hefst í dag, fimmtudag. Allur ágóði Bleiku slaufunnar í ár rennur til krabbameinsrannsókna.

„Lögð er áhersla á að krabbameinsrannsóknir séu forsenda framfara. Sá mikli árangur sem sannarlega hefur náðst er ekki síst þeim að þakka. Dánartíðni kvenna af völdum krabbameina hefur lækkað um 35% á síðustu 50 árum og lífslíkur kvenna hafa nær tvöfaldast.

Krabbameinsfélagið hefur frá upphafi lagt ríka áherslu á rannsóknir. Krabbameinsskrá Krabbameinsfélagsins sérhæfir sig í skráningu, tölfræði og rannsóknum á faraldsfræði krabbameina. Nýlegt verkefni er gæðaskráning krabbameina í samstarfi við Landspítala og Sjúkrahúsið á Akureyri. Í ár hleypti félagið af stokkunum Áttavitanum, rannsókn á reynslu fólks sem hefur greinst með krabbamein. Auk þess hefur Vísindasjóður Krabbameinsfélagsins á síðustu fjórum árum styrkt 30 íslenskar krabbameinsrannsóknir um 227 milljónir króna.

Félagið vill stuðla að auknum framförum í baráttunni gegn krabbameinum með öflugu vísindastarfi, fræðslu og forvörnum, ráðgjöf og stuðningi. Fækka þeim sem fá krabbamein, fjölga þeim sem lifa og bæta lífsgæði þeirra,“ segir í tilkynningu.

Bleika slaufan í ár er líkt og í fyrra ekki næla heldur hálsmen. Hönnuður slaufunnar er Guðbjörg Ingvarsdóttir, skartgripahönnuður í Aurum.

„Á hverju ári greinast 800 konur með krabbamein og við missum 300 konur úr sjúkdómunum. Því miður eru þetta allt of margar konur. Lífslíkur kvenna hafa þó tvöfaldast á síðustu 50 árum. Það er mjög stór sigur. Þessi góði árangur hefur fyrst og fremst náðst vegna rannsókna sem knýja þessar framfarir fram. Í ár söfnum við því sérstaklega fyrir krabbameinsrannsóknum,“ segir Halla Þorvaldsdóttir, framkvæmdastjóri Krabbameinsfélagsins í fréttatilkynningu.

mbl.is