Innlent | Morgunblaðið | 3.10.2020 | 9:02

Aldrei fleiri í farsóttarhúsum

Gylfi Þór Þorsteinsson í farsóttarhúsinu á Rauðarárstíg. mbl.is/Ásdís

Aldrei hafa fleiri dvalið í farsóttarhúsunum við Rauðarárstíg heldur en síðustu daga og hefur fjölgað jafnt og þétt í hópnum. Um miðjan dag í gær voru þar 75 manns, langflestir í einangrun með kórónuveikina, að sögn Gylfa Þórs Þorsteinssonar, umsjónarmanns farsóttarhúsanna. Hann segir að nú dvelji nánast eingöngu Íslendingar í farsóttarhúsunum og fólk innan við miðjan aldur sé áberandi í hópnum.

Sex manns hafa verið þar við störf undanfarið, en í vikunni var auglýst eftir fleira starfsfólki. Gylfi segir að unnið sé á vöktum allan sólarhringinn og vegna álags sé nauðsynlegt að fjölga um 4-5 starfsmenn.

Hann segir að unnið sé að því að útbúa nýja aðstöðu og bæta við einangrunarrýmum, sem full þörf virðist vera á. Hins vegar eigi hann von á því að allstór hópur fari til síns heima um helgina og þá létti á í farsóttarhúsunum við Rauðarárstíg.

Um miðjan dag í gær voru 54 einstaklingar í upprunalega farsóttarhúsinu við Rauðarárstíg, þar sem áður var Hótel Lind. Í húsinu við hliðina var 21 einstaklingur, en bæði húsin eru í eigu Fosshótela. Það er Rauði krossinn á Íslandi sem hefur umsjón með farsóttarhúsunum á Rauðarárstíg.

Göngudeildin efld til að mæta álagi

Sjúklingum í eftirliti fjölgar hratt Göngudeild vegna kórónuveikinnar hefur síðustu dag verið efld í samræmi við aukinn fjölda smitaðra í samfélaginu, samkvæmt upplýsingum frá Önnu Sigrúnu Baldursdóttur, aðstoðarmanni forstjóra Landspítala. Starfið felst í reglulegri eftirfylgd símleiðis við fólk í einangrun og eins er fólki sinnt á göngudeildinni í Birkiborg, þegar það þarfnast sérstaks mats eða uppvinnslu.

Göngudeildin var opnuð síðari hluta marsmánaðar en eftir því sem smituðum fækkaði í vor dró úr starfseminni. Breytingarnar nú felast í auknum fjölda verkefna og þar með auknum fjölda starfsmanna sem sinna verkefnum deildarinnar, bæði í símaþjónustu og í Birkiborg.

Fram kemur á heimasíðu Landspítalans að í gær voru 609 sjúklingar í eftirliti Covid-19 göngudeildarinnar. Þeir voru 572 á fimmtudag, 550 á miðvikudag, 519 á þriðjudag og 497 sjúklingar voru í eftirliti göngudeildarinnar á mánudag. Ragnar Freyr Ingvarsson er yfirlæknir deildarinnar og Sólveig Sverrisdóttir deildarstjóri. aij@mbl.is