Stór aurskriða féll í Eyjafirði

Stór aurskriða féll í dag ofan við bæinn Gilsá 2 í Eyjafirði. Engan sakaði eftir því sem næst verður komist, en skriðan staðnæmdist um 100 metrum frá húsinu. Búseta er á bænum, en enginn var í húsinu þegar skriðan féll. Þetta kemur fram í tilkynningu frá lögreglunni á Norðurlandi eystra.

Aurskriða féll úr Hleiðargarðsfjalli fyrir ofan Gilsá 2 í Eyjafirði. Ljósmynd/Lögreglan

Þá segir jafnframt að fleiri smærri skiður hafi fallið og heyrðust drunur frá skriðusárinu sem eru merki um að grjót sé enn að falla. Lögreglan á Norðurlandi eystra er á staðnum og von er á sérfræðingi frá Veðurstofu Íslands til að meta aðstæður. Ekki er útilokað að fleiri skriður geti fallið.

Aurskriðan stöðvaðist um 100 metra frá íbúðahúsinu að Gilsá 2. Ljósmynd/Lögreglan

• Blogga um frétt