Einn í haldi vegna húsbrota

Einn er í haldi lögreglunnar á Norðurlandi eystra grunaður um aðild að fjölda húsbrota á Siglufirði undanfarnar nætur. Bergur Jónsson, aðstoðaryfirlögregluþjónn við rannsóknardeild lögreglustjóraembættisins á Norðurlandi eystra, segir að maðurinn verði yfirheyrður síðar í dag en ekki er vitað á þessu stigi hvort hann hafi átt aðild að húsbrotunum.

Tilkynnt var til lögreglu um að brotist hafi verið inn í grunnskólann á Siglufirði í nótt og stolið lyfjum. Það mál er í rannsókn lögreglu sem og bifreiðaþjófnaður. Ekki er vitað hvort þessi tvö mál tengist fjölmörgum húsbrotum í bænum undanfarna sólarhringa en það er til rannsóknar hjá lögreglu að sögn Bergs. 

Lögreglustöðin á Siglufirði. mbl.is/Gúna

Farið hefur verið inn í nokkurn fjölda húsa á Siglufirði undanfarna daga og verðmætum stolið. Þar sem húsin voru í öllum tilvikum ólæst er ekki um innbrot að ræða heldur húsbrot.

Líkt og fram hefur komið á mbl.is komu húsráðendur að þjófnum á tveimur stöðum þar sem hann var kominn inn. Hann náði að koma sér út úr húsunum og í burtu.Maðurinn var sagður dökkklæddur, með dökka hettu sem huldi andlit að mestu. 

Frétt af mbl.is

Fór inn í nokkur ólæst hús á Siglufirði

Bergur segir að lögreglan vilji hvetja fólk til þess að læsa húsum sínum og geyma ekki verðmæti fyrir allra augum. 

• Blogga um frétt