Sungið, dansað, bakaðar vöfflur og blásið í blöðrur

Starfsfólk og börn á Drafnarborg minnast þess í dag að 70 ár eru frá því leikskólinn var tekinn í notkun. Húsnæðið var hannað og byggt sérstaklega sem leikskóli og hafði slíkt ekki verið gert áður í Reykjavík.

„Við ætlum að hafa gaman með litlu börnunum, syngja, dansa, baka vöfflur og blása í blöðrur,“ segir Halldóra Guðmundsdóttir leikskólastjóri um afmælisveisluna í Morgunblaðinu í dag.

Leikskólarnir Drafnarborg á Drafnarstíg og Dvergasteinn á Seljavegi sameinuðust 2011 og eru sex deildir í þremur húsum. Fjórar deildir elstu barnanna eru á Seljavegi en eins og tveggja ára börnin á Drafnarstíg.