Um 80% listamanna segjast hafa orðið fyrir tekjufalli vegna heimsfaraldurs kórónuveirunnar. Helmingur segir að tekjur sínar hafi skerst um meira en 50% og fimmtungur listamanna segir að tekjufall sitt nemi um 75-100%. Þetta eru niðurstöður tveggja kannana sem BHM gerði meðal listamanna á Íslandi.

Tekjur meirihluta svarenda eru undir framfærsluviðmiði og helmingur svarenda segist eiga í erfiðleikum með að standast fjárhagslegar skuldbindingar. Fjölmörg ríki hafa ákveðið að styðja við bakið á listamönnum með sértækum úrræðum vegna kórónuveirufaraldursins en Ísland er ekki þar á meðal.

Kannanirnar voru gerðar í september og október og náðu til um 1.700 listamanna innan aðildarfélaga Bandalags íslenskra listamanna auk fjölmargra hagsmunasamtaka innan tónlistargeirans. Meðal listamannanna sem tóku þátt eru sviðslistamenn, tónlistarmenn, fólk í kvikmyndageiranum, myndlistarmenn og fólk sem fæst við ritlist. Auk þess var horft til stoðgreina á borð við tækniþjónustu sem tengist viðburðahaldi.

Tekjuhrun algjört hjá þriðjungi tónlistarmanna

Um 82% svarenda í könnunum BHM sögðu að sóttvarnaráðstafanir vegna kórónuveirufaraldursins væri ástæða tekjuhruns þeirra. Færri bókanir vegna viðburða gerði það að verkum að 75-80% tónlistarmanna sagði að tekjusamdráttur sinn hafi verið meiri en 50% og þriðjungur tónlistarmanna sagði tekjur sínar hafa hrunið að öllu leyti.

Tveir af hverjum þremur segjast, samkvæmt könnunum BHM, þurfa að leita á náðir stjórnvalda. Hins vegar segir í fréttatilkynningu BHM að bótaúrræði stjórnvalda nýtist sjálfstætt starfandi listamönnum illa. Þannig segjast 60% svarenda sem eru sjálfstætt starfandi að einhverju leyti ekki fá nema hluta af bótum greiddan eða hafi verið alfarið synjað um bótaúrræði.

Tengdar fréttir

Kórónukreppan

Áfangaheimilinu lokað ef ekki er gripið inn í

• „Þetta er allt saman á fleygiferð“
• Of harðar aðgerðir í faraldrinum
• Sjá fram á minna atvinnuleysi
• „Það er best að hafa samræmi í þessu“

» Fleiri tengdar fréttir

• Blogga um frétt