Innlent | mbl | 20.10.2020 | 12:32 | Uppfært 13:43

Einstaka smit í sundi en „fullt“ í líkamsrækt

Frá líkamsræktarstöð í mars, kvöldið áður en þær þurftu að loka í fyrsta sinn vegna Covid-19. mbl.is/Kristinn Magnússon

Þórólfur Guðnason sóttvarnalæknir segist ekki vita hvort þær takmarkanir sem líkamsræktarstöðvum hafa verið settar muni duga til að koma í veg fyrir smit innan stöðvanna. Hann vonar það þó. Hundruð smita í þriðju bylgju má rekja til líkamsræktarstöðva.

Þórólfur hafði lagt til að líkamsræktarstöðvum yrði áfram lokað, eins og verið hefur í rúmar tvær vikur. Á það féllst heilbrigðisráðherra ekki og er líkamsræktarstöðvum nú heimilt að opna á svokallaða „lokaða tíma“ þar sem mest 20 koma saman. Fólki er ekki heimilt að deila búnaði og tveggja metra reglan skal viðhöfð.

Frétt af mbl.is

Uppbókað í alla tíma eftir tveggja vikna lokun

„Ég veit það ekki en vona það svo sannarlega,“ segir Þórólfur, spurður hvort hann telji að gildandi takmarkanir muni koma í veg fyrir smit.

„Ég hafði náttúrulega lagt til að þeim yrði lokað áfram. Ég vona svo sannarlega að þær takmarkanir sem voru settar á þeirra starfsemi dugi. Maður getur ekkert annað gert en vonað að menn standi sig í því.“

Sundlaugar eru víða tómlegar þessa dagana en sundlaugum á landsbyggðinni hefur þó ekki verið lokað. mbl.is/Þorvaldur Örn Kristmundsson

Klórinn í laugunum drepur veiruna

Eins og áður sagði lagði Þórólfur til að allar líkamsræktarstöðvar landsins yrðu lokaðar áfram, sundstöðum á höfuðborgarsvæðinu stæðu einnig lokaðir en sundstaðir á landsbyggðinni mættu halda dyrum sínum opnum. Spurður hvers vegna sé skárra að opna sundlaugar en líkamsræktarstöðvar segir Þórólfur:

„Við erum í grunninn bara að reyna að minnka hópamyndum, hvaða nafni sem hún nefnist. Ég held að smithætta sé almennt minni í sundi en líkamsræktarstöðvum.“

Frétt af mbl.is

World Class opnað á morgun

Hvers vegna?

„Það er bara öðruvísi hópamyndun í laugunum og svo drepur klórinn í vatninu í laugunum veiruna. Það er hægt að rekja einstaka smit til sundlauga en það er hægt að rekja fullt af smitum til líkamsræktarstöðva.“

Þórólfur Guðnason sóttvarnalæknir á einum af fjölmörgum upplýsingafundum almannavarnadeildar ríkislögreglustjóra. mbl.is/Kristinn Magnússon

Höfum dæmin fyrir augunum

Fólki er náttúrulega ekki heimilt að nota sameiginlegan búnað í líkamsræktarstöðvunum en er það nóg? Er ekki líka hætta á dropasmiti í líkamsrækt?

„Það hefur náttúrulega verið gerð krafa um þessa tveggja metra reglu. [...] Það hefur verið mælst til þess að búnaður sé hreinsaður á milli einstaklinga en ég veit svo sem ekkert hvernig það hefur verið í framkvæmd í sjálfu sér. Við höfum bara þessi dæmi fyrir augunum núna í þessari bylgju smits sem er í gangi núna,“ segir Þórólfur.

Frétt af mbl.is

Smit rakin til nokkurra stöðva

Er meiri hætta á dropasmiti eða snertismiti í þessum stöðvum?

„Ég held að það sé erfitt að segja. Þetta tengist allt þessu þrennu sem við erum búin að vera að hamra á að geti spilað rullu þar. Það er dropasmit, úðasmit hugsanlega og svo snertismit,“ segir Þórólfur.

Bjóða snerti- og dropasmit upp á jafn mikla smithættu?

„Ég held að það geti bara verið breytilegt frá einum stað til annars og einum tíma til annars.“