Farsóttarhús hefur verið opnað á Akureyri fyrir þá sem smitast hafa af Covid-19 en eiga þess ekki kost að dvelja í einangrun heima hjá sér. Þetta er fyrsta farsóttarhúsið sem opnar utan Reykjavíkur í þessari bylgju faraldursins.
Ástandið er hvað skæðast á Norðurlandi eystra af öllum stöðum utan Sunnlendingafjórðungs en í stöðuskýrslu almannavarna í dag er það þó metið „þokkalegt.“
Á þessari stundu dvelja aðeins örfáir í nýju farsóttarhúsi að sögn Jóhanns K. Jóhannssonar, upplýsingafulltrúa almannavarna. Virk smit á Norðausturlandi eru 41 og 119 eru í sóttkví.
Í farsóttarhúsunum tveimur sem starfrekin eru í Reykjavík dveljast nú 83, þar af eru 66 í einangrun. Í einangrun eru 1.027.