Slökkvilið höfuðborgarsvæðisins hefur farið í 250 sjúkraflutninga síðustu tvo sólarhringa. Af þeim eru 82 sjúkraflutningar með Covid-19-sjúklinga. Afar óvenjulegt er að svo margir sjúkraflutningar séu um helgar.
Að sögn varðstjóra í slökkviliði höfuðborgarsvæðisins hafa síðustu sólarhringar verið erilsamir en síðasta sólarhringinn var farið í 108 sjúkraflutninga, þar af 29 forgangsflutninga og 38 Covid-flutninga. Sólarhringinn á undan voru sjúkraflutningarnir 142 talsins og þar af 44 sjúkraflutningar með sjúklinga með Covid-smit.
Meðal verkefna er flutningar á sjúklingum af Landakoti og eins Reykjalundi en hópsýkingar hafa komið upp á báðum stöðum undanfarna sólarhringa.
Slökkviliðið fór í tvö útköll á dælubíla síðasta sólarhringinn, þar á meðal vegna alelda bifreiðar við Álfhólsveg í Kópavogi um þrjú í nótt.
Bætt við klukkan 7:20
„Við hjá SHS leggjum mikla áherslu á að leysa þessi Covid-tengdu verkefni á sem öruggastan hátt fyrir bæði starfsfólk okkar og skjólstæðinga. Það er sannarlega ekki auðvelt að sinna sjúklingum á vettvangi í fullum hlífðarfatnaði og auk þess fer mikill tími í þrif og sótthreinsun á bílum og búnaði. Við ætlum að klára þetta verkefni með sóma og biðlum til ykkar þarna úti að fara varlega og huga að persónulegum sóttvörnum,“ segir í færslu á facebooksíðu slökkviliðs höfuðborgarsvæðisins.
Dagvakt slökkviliðsins á Akureyri hefur einnig haft nóg að gera því í gærdag fór hún í sjö sjúkraflutninga. Þar af eru þrír flutningar Covid-tengdir.