Innlent | mbl | 17.11.2020 | 23:32 | Uppfært 18.11.2020 8:52

Hvaða breytingar taka gildi á miðnætti?

Hárgreiðslustofur opna á nýjan leik. mbl.is/Árni Sæberg

Tilslakanir á gildandi samkomutakmörkunum taka gildi núna á miðnætti. Hér verður farið yfir hverjar þær eru helstar.

Frétt af mbl.is

Fari hægt í allar tilslakanir

Íþrótta-, æskulýðs- og tómstundastarf barna í leik- og grunnskólum verður heimilt á nýjan leik.

Í framhaldsskólum verða fjöldamörk aukin í 25.

Hægt verður að hefja aftur ýmsa þjónustustarfsemi sem krefst snertingar eða mikillar nándar, svo lengi sem notast er við andlitsgrímur. Þetta á meðal annars við um hárgreiðslu- og nuddstofur.

Frétt af mbl.is

Grímuskylda barna í 5. - 7. bekk afnumin

Í gær var svo tilkynnt að börn í 5. – 7. bekk grunnskóla verða undanþegin grímuskyldu og tveggja metra nálægðartakmörkunum, líkt og yngri börn í grunnskóla og leikskólabörn.

Frétt af mbl.is

Helstu sóttvarnareglur í leik- og grunnskólum

Almennar fjöldatakmarkanir miðast áfram við tíu manns. Gert er ráð fyrir að hægt verði að draga enn frekar úr samkomutakmörkunum í byrjun desember.

Nánar um breytingarnar:

Starfsemi og þjónusta sem krefst snertingar milli fólks verður leyfð með þeim skilyrðum að notast sé við andlitsgrímur. Þetta á við um s.s. hárgreiðslustofur, nuddstofur, öku- og flugkennslu og sambærilega starfsemi. Hámarksfjöldi viðskiptavina á sama tíma er 10 manns.
Æfingar, íþróttastarf, æskulýðs- og tómstundastarf barna á leik- og grunnskólaaldri verður heimilt jafnt inni og úti. Til að slíkt starf geti farið fram eru engar takmarkanir settar varðandi blöndun milli hópa. Fjöldamörk í hverju rými fara eftir reglugerð um takmarkanir á skólastarfi. Leikskólabörn og börn í 1.–4. bekk grunnskóla mega vera 50 saman að hámarki en nemendur í 5.–10. bekk að hámarki 25 saman.
Í skólastarfi á framhaldsskólastigi mega nemendur og starfsmenn vera að hámarki 25 í hverju rými í stað 10 áður en ber að nota andlitsgrímur sé ekki unnt að halda 2 metra fjarlægð.
Veitt er undanþágu frá grímuskyldu þeim sem ekki geta notað grímur, t.d. af heilsufarsástæðum eða ef viðkomandi skortir þroska eða skilning til að bera grímu. Þeir sem fengið hafa COVID-19 eru einnig undanþegnir grímuskyldu geti þeir sýnt gilt vottorð þess efnis.