„Það gefur augaleið að staða félagsins er mjög alvarleg. Það hefur verið tekjulaust frá því í byrjun mars,“ segir Björgólfur Jóhannsson, fyrrverandi forstjóri Icelandair og eigandi 10% hlutar í Loftleiðum Cabo Verde.
Vísar hann í máli sínu til stöðu flugfélagsins Cabo Verde Airlines (CVA) á Grænhöfðaeyjum. Loftleiðir Cabo Verde fara með 51% eignarhlut í flugfélaginu, en auk Björgólfs eru íslenskir einkafjárfestar og Loftleiðir-Icelandic, dótturfélag Icelandair Group, í eigendahópnum. Loftleiðir Icelandic fer með um 70% hlut í Loftleiðum Cabo Verde og á félagið því alls um 36% hlut í CVA.
Að sögn Björgólfs er staðan mjög snúin. Ríkisstjórnin á Grænhöfðaeyjum fer með 39% hlut í CVA, en nýlega var greint frá því að hún myndi koma að björgun félagsins með einhverjum hætti. „Ríkið hefur verið að aðstoða félagið eitthvað síðustu mánuði. Þeir voru með svipaðar úrlausnir og á Íslandi hvað hlutdeild í launakostnaði varðar. Það var ekkert sem viðkom því að greiða skuldir félagsins. Það er því alveg ljóst að fyrirtækið er orðið mjög tætt vegna viðvarandi tekjuleysis,“ segir Björgólfur í umfjöllun um Loftleiðir Cabo Verde í Morgunblaðinu í dag.