Búið er að koma atkvæðagreiðslukerfi Alþingis í lag. Kerfið er notað til að greiða atkvæði í þingsal, en bilunin komst upp fyrir helgi. Þetta segir Ragna Árnadóttir, skrifstofustjóri Alþingis, í samtali við mbl.is.
„Núna ætti þetta að vera komið í lag. Þetta var bilun í tækjabúnaði, en ætti að ganga eðlilega hér eftir,“ segir Ragna, en ef kerfið hefði ekki komist í lag hefði komið til greina að notast við handauppréttingar.
Aðspurð segir hún að aukaprófanir hafi verið gerðar og því ætti kerfið að virka vel við næstu atkvæðagreiðslu.