Fékk ár fyrir þjófnað úr Gull og silfri og fleiri brot

Héraðsdómur Reykjavíkur.
Héraðsdómur Reykjavíkur. mbl.is/Þór

Héraðsdómur Reykjavíkur dæmdi í dag karlmann til 12 mánaða fangelsisvistar fyrir margþátta þjófnað og eina líkamsárás á tímabilinu frá 17. febrúar til 13. október á þessu ári.

Heildarverðmæti þýfisins var rétt rúmlega níu milljónir króna. Þjófnaðurinn var margþátta eins og fyrr segir og var smávægilegur í upphafi. Maðurinn rændi vörum úr matvöruverslun að andvirði rúmlega 15 þúsund króna. Hann braust svo síðar inn í fleiri verslanir og smásöluturna og stal þaðan sígarettum, að andvirði allt að 600 þúsund króna þegar mest lét.

Í verslun Bónus á Akranesi veittist hann svo að afgreiðslustúlku sem varð uppvís af þjófnaði mannsins og reyndi að stöðva hana. Maðurinn hrækti meðal annars til konunnar og loks á hana.

Hans stærsti þjófnaður var svo í skartgripaverslun Gulls og silfurs þar sem hann tók allt steini léttara, skartgripi að andvirði rúmlega 5,2 milljóna króna. Loks, þann 13. október, braust hann inn í verslun Elko á Granda og stal þaðan raftækjum og öðru að andvirði tæplega þriggja milljóna króna.

Manninum var gert að greiða rúmlega 750 þúsund krónur í málsvarnarkostnað. Frá refsingunni dregst óslitið gæsluvarðhald frá 21. október síðastliðnum.

mbl.is