Sjálfsbjörg vill láta loka gati í reglugerð

Bergur Þorri Benjamínsson, formaður Sjálfsbjargar, finnur að því að enn sé ekki komið aðgengi fyrir hreyfihamlaða í hið nýja þjónustuhús á Borgarfirði eystra í Múlaþingi, sem opnað var í sumar.

„Þar, eins og víðar, eru aðgengismálin ótrúlega oft látin mæta afgangi,“ en þar varð húsbyggingin dýrari en að var stefnt og látið bíða betri tíma að setja upp lyftu fyrir hreyfihamlaða.

Að sögn Bergs Þorra ætti það að vera jafnsjálfsagt að kröfur um aðgengi væru uppfylltar við húsbyggingu og brunavarnir, engum dytti í hug að láta þær bíða, að því er ftam kemur í Morgunblaðinu í dag.

„Þarna er einfaldlega gat í regluverkinu, sem býður upp á það að þegar peningurinn er að klárast er þessum hlutum frestað en ekki einhverjum öðrum. Að því er virðist vegna þess að það snýr sérstaklega að tilteknum hópi.“