Sex starfsmenn hafa greinst með Covid-19 á leikskólanum Gimli í Njarðvík. Fyrst greindist einn starfsmaður smitaður á laugardag og í framhaldinu fimm í viðbót. Víkurfréttir greina frá.
Leikskólanum var lokað í gær, mánudag, og verður ekkert starf í skólanum út vikuna að minnsta kosti.
Allir starfsmenn leikskólans og 85 leikskólabörn eru nú í sóttkví. Þar að auki þarf að minnsta kosti eitt foreldri að fara í sóttkví með hverju barni að sökum aldurs barnanna.
Mikil fjölgun fólks í sóttkví á Suðurnesjum útskýrist að hluta af þessu. Á Suðurnesjum eru tíu einstaklingar í einangrun vegna staðfests Covid-19-smits og 135 í sóttkví.