Fjallahlaupahópur Ferðafélags Íslands lætur frostaveðrið ekki á sig fá og hefur frá því klukkan fjögur í gær hlaupið hring eftir hring í kringum Reynisvatn til styrktar sumarbúðum lamaðra og fatlaðra í Reykjadal. Hlaupið stendur yfir til klukkan fjögur í dag og vonast Kjartan Long, forsprakki hlaupahópsins, til þess að um 2-300 þúsund krónur hafi safnast í lok dags.
En Kjartan, er ykkur ekki kalt?
„Nei, okkur er svo hlýtt í hjartanu,“ segir hann í samtali við mbl.is.
Til að gæta að sóttvörnum hleypur alltaf bara einn hlaupari í einu, þannig verður engin hópamyndun.
„Við erum 28 í hópnum og þetta er sólarhringshlaup þannig að allir fá svona einn klukkutíma hver. Svo eru á meðal okkar hjón sem hlaupa þá saman.“
Kjartan segir að lítið mál sé að hlaupa þrátt fyrir frostið sem nú ríkir. Í nótt hafi náttúran skartað sínu fegursta fyrir allra hörðustu hlauparana.
„Það var dúnalogn og stjörnubjart hérna í nótt, alveg ótrúlega fallegt. Svo erum við með lítið eldstæði og við kveiktum á kertum þannig að þetta er alveg rosalega kósí hjá okkur.“
Þegar hlaupið hófst höfðu safnast um 100 þúsund krónur.
„Ég vona að þetta verði komið upp í svona 2-300 þúsund í lok dags. Það væri alveg afskaplega flott. Það færi þá í að kaupa húsgögn og annað nytsamlegt fyrir sumarbúðirnar.“
Öllum er frjálst að heita á hlaupagarpana sem verða að til klukkan fjögur í dag.
Kennitala: 630269-0249
Reikningsnúmer 0526-04-250210