Inga Sæland, formaður Flokks fólksins, segir í áramótagrein í Morgunblaðinu í dag, að þegar sigurfáninn í baráttunni gegn kórónuveirunni verði dreginn að húni á nýju ári taki við nýjar áskoranir. „Við þurfum að reisa við efnahag heillar þjóðar. Það munum við gera öll sem eitt," segir Inga.
Hún segir verkefni stjórnmálanna á nýju ári liggi augljóslega í endurreisninni. „Okkur ber öllum skylda til þess að hjálpa þeim sem hafa orðið fyrir skakkaföllum í þeim hremmingum sem samfélagið okkar allra varð fyrir á árinu sem er að líða.“
Fram kemur í greininni, að dóttir hennar, sem er hjúkrunarfræðingur, sýktist af kórónuveirunni og barðist við óværuna vikum saman áður en Covid-teymið útskrifaði hana sem hún væri búin að ná bata.
„Hún var svo sem ekki lengur smitandi fyrir aðra, en eftirköstin eftir þessa útskrift voru vægast sagt ömurleg. Þar á meðal voru sótthitaköst, orkuleysi og andnauð við minnstu hreyfingu. Þarna gátu allir sem til þekktu, og þar með ég, séð að hvergi fór á milli mála að hér var engin venjuleg veiruflensa á ferð, þótt til séu þeir sem vilja halda öðru fram. Sem betur fer eru það þó mun fleiri sem viðurkennt hafa þá dauðans alvöru sem veiran ber með sér,“ segir Inga.