Veðurstofan hefur uppfært veðurviðvaranir upp í appelsínugult ástand á morgun og eins hefur lögreglan á Norðurlandi eystra varað fólk við óveðrinu sem er væntanlegt í nótt.
Að sögn veðurfræðings Vegagerðarinnar mun mjög snarpur norðvestan-vindstrengur ná inn á landið austanvert í nótt og fyrramálið. Hríðarveður norðaustan til og allt að 23-28 m/s austanlands. „Miklir hnútar verða suðaustanlands frá Breiðamerkursandi og austur á firði. Hviður allt að 40-50 m/s. Undir Eyjafjöllum verða fram undir kvöld snarpar og skeinuhættar hviður í N-átt þvert á veg allt að 40-50 m/s,“ segir á vef Vegagerðarinnar.
„Lögreglan á Norðurlandi eystra varar við slæmu veðurútliti fram undan, með mjög hvassri norðvestanátt og snjókomu á svæðinu. Veðurofsinn hefst í kvöld og mun standa fram á miðjan dag á morgun, laugardag. Vert er að nota daginn í dag og huga að lausum munum og jafnvel jólaskrauti. Reikna má með að vegir teppist og ekki mun viðra til ferðalaga. Eigendur báta og annarra eigna við sjó og hafnir eru beðnir um líta eftir eigum sínum, þar sem norðvestanátt er víða til vandræða við þessar aðstæður,“ segir í viðvörun lögreglunnar á Norðurlandi eystra á Facebook.
Á Norðurlandi eystra tekur appelsínugul viðvörun gildi klukkan 3 aðfaranótt laugardags og gildir hún til hádegis á morgun. „Norðvestan 20-25 m/s með snjókomu og skafrenningi, stórhríð á köflum. Lélegt skyggni og ekkert ferðaveður.“
Frá hádegi til klukkan 17 verður síðan gul viðvörun í gildi á Norðurlandi eystra en þá er spáð
Klukkan 18 á morgun tekur síðan við gul viðvörun og gildir hún til klukkan 1 aðfaranótt sunnudags.
Á Norðurlandi vestra og Ströndum er gul viðvörun í gildi frá klukkan 1 í nótt og þangað til í fyrramálið.