Þórunn Egilsdóttir, þingflokksformaður Framsóknar, gefur ekki kost á sér á lista Framsóknarflokksins fyrir alþingiskosningar í haust. Hún mun einhenda sér í baráttu við krabbamein sem hún greindist óvænt með skömmu fyrir jól. Þetta kemur fram í yfirlýsingu á facebooksíðu Þórunnar rétt í þessu. 

Þórunn er oddviti Framsóknar í Norðausturkjördæmi, þingflokksformaður og formaður samgönguráðs. 

„Meinið hefur tekið sig upp að nýju en brýnt er að vera bjartsýn. Maður verður alltaf að horfa fram á við. Og maður má aldrei missa vonina. Aldrei. Framboð til Alþingis verður hins vegar að bíða betri tíma. Ég mun því ekki gefa kost á mér til að leiða lista Framsóknarflokksins í Norðausturkjördæmi í komandi alþingiskosningum,“ skrifar Þórunn. 

Þórunn glímdi við brjóstakrabbamein fyrr á þessu kjörtímabili og var frá þingstörfum í rúmt ár. Hún sneri til vinnu í vor eftir að hafa náð bata. 

Í aðdraganda jóla greindist svo krabbamein í lifur Þórunnar og starfaði lifrin að mjög litlu leyti. Meðferð við krabbameininu hófst annan í jólum.

Frétt af mbl.is

Þórunn í lyfjameðferð vegna krabbameins

„Keik vil ég mæta þessu verkefni eins og öðrum. Læknunum treysti ég til að lækna mig og mitt er að sjá um að hafa hausinn rétt skrúfaðan og horfa fram á við,“ sagði Þórunn í tilkynningu þegar hún greindi frá veikindum sínum.

Tengdar fréttir

Alþingiskosningar 2021

Hafa „ágætis tíma“ til úrbóta

• Spyr hvort að ekki þurfi að boða til kosninga
• Niðurstaða MDE kallar á breytingar
• Niðurstaða MDE hefur engin bein réttaráhrif
• Stjórnvöld þurfi að axla ábyrgð

» Fleiri tengdar fréttir

• Blogga um frétt