Nú geta nemar Fjölsmiðjunnar sótt einingabært nám á 1. þrepi í samstarfsskólum Fjölsmiðjunnar.
Fyrr í dag var samstarfssamningur Fjölsmiðjunnar á höfuðborgarsvæðinu, Borgarholtsskóla, Fjölbrautarskólans við Ármúla, Fjölbrautarskólans í Breiðholti og Tækniskólans undirritaður í húsnæði Fjölsmiðjunnar.
Segir í tilkynningu frá Fjölsmiðjunni að í fyrstu verði boðið upp á nám í íslensku, stærðfræði og lífsleikni. Einingarnar sem nemarnir ljúka eru svo metnar til áframhaldandi náms ef svo er kosið.
Síðastliðinn september hlaut Fjölsmiðjan viðurkenningu frá Menntamálastofnun sem framhaldsfræðsluaðili á 1. þrepi.
„Þessi viðurkenning hefur mikla þýðingu fyrir starfsemi og nema Fjölsmiðjunnar þar sem nemar fá aukin tækifæri til náms í Fjölsmiðjunni sem metið verður til framhaldsskólaeininga. Þá er þetta ekki síður viðurkenning á þeirri þróun á faglegu starfi Fjölsmiðjunnar sem hefur átt sér stað á síðastliðnum árum.“ segir í tilkynningu frá Fjölsmiðjunni.
Fjölsmiðjan er sjálfseignarstofnun og á 20 ára farsæla sögu á þessu ári. Hún sinnir mikilvægu hlutverki hvað varðar félags- og virkniúrræði fyrir ungmenni. Hægt er að kynna sér starfsemi Fjölsmiðjunnar betur hér.