86 tilkynningar vegna gruns um aukaverkanir

Frá bólusetningu vegna Covid-19 fyrir áramót.
Frá bólusetningu vegna Covid-19 fyrir áramót. mbl.is/Kristinn Magnússon

Alls hafa Lyfjastofnun Íslands borist 86 tilkynningar vegna gruns um aukaverkanir í kjölfar bólusetningar gegn Covid-19. Þar af eru 23 tilkynningar vegna bóluefnis Moderna og 63 vegna bóluefnis Pfizer/BioNTech. Níu tilkynninganna eru alvarlegar. 

Þetta kemur fram á vefsíðu Lyfjastofnunar. 

Átta tilkynninganna um bóluefni Pfizer eru alvarlegar og eins og komið hefur fram eru sjö þeirra vegna dauðsfalla. Fimm dauðsfallanna hafa verið rannsökuð af embætti landlæknis. Á upplýsingafundi almannavarna á mánudag kom fram að í fjórum tilvikum væri ekki eða mjög ólíklegt að um orsakatengsl væri að ræða en í einu tilvikinu var ekki hægt að segja til um orsakatengsl með vissu.

Einungis ein alvarleg tilkynning hefur borist vegna bóluefnis Moderna. Í því tilfelli er um að ræða bráðaofnæmi sem kom upp hjá bólusettum einstakling.

Beinn samanburður ómögulegur

Hafa ber í huga að mun fleiri hafa verið bólusettir með bóluefni Pfizer. Þá voru einnig veikari og eldri einstaklingar bólusettir með bóluefni Pfizer en bóluefni Moderna. 

„Þar sem bóluefnin berast ekki á sama tíma er óhjákvæmilegt að hópar mismunandi að samsetningu fái ólík bóluefni. Það gerir beinan samanburð milli þeirra ómögulegan. Í fyrstu forgangshópum bólusetningar er meðal annars heilbrigðisstarfsfólk, en því ber skylda til að tilkynna um aukaverkanir samkvæmt lyfjalögum og  hefur þessi skylda áhrif á fjölda tilkynninga, og þá til fjölgunar þeirra, að mati Lyfjastofnunar,“ segir á vef Lyfjastofnunar og jafnframt:

„Auk heilbrigðisstarfsmanna eru aldraðir einstaklingar fremstir í forgangi bólusetningar. Margir þeirra hafa undirliggjandi sjúkdóma. Því má búast við fleiri tilkynningum vegna bólusetningar í þeim hópi, en hins vegar þarf ekki að vera um orsakasamband að ræða milli bólusetningar og tilkynntra tilvika.  Slíkt er metið í hverju tilfelli fyrir sig.“

Á vef Lyfjastofnunar kemur einnig fram að mikilvægt sé að hafa hugfast að fjöldi tilkynninga vegna gruns um aukaverkun segi ekki til um tíðni raunverulegra aukaverkana eftir bólusetningu eða öryggi bóluefna.

„Slíkar tilkynningar eru notaðar til að fylgjast með öryggi lyfja eftir að notkun þeirra hefst og er það gert m.a. með því að meta hvort líkur séu á því að orsakasamband sé milli lyfjanotkunar og þess tilviks sem tilkynnt er. Þannig er ekki víst að tilkynningarnar endurspegli raunverulegar aukaverkanir af bóluefnunum en það er metið í hverju tilfelli fyrir sig.“

mbl.is

Bloggað um fréttina