Innlent | mbl | 27.1.2021 | 16:37

Fyrsta bólusetningarvottorði framvísað í gær

Á Keflavíkurflugvelli er einnig tekið við mótefnavottorðum, en alls hafa …

Lögreglan í flugstöðvardeild lögreglunnar á Suðurnesjum tók við bólusetningarvottorði frá farþega sem kom til landsins í gær, því fyrsta síðan bólusetningar gegn kórónuveirunni hófust.

Þetta staðfestir Sigurgeir Sigmundsson, yfirlögregluþjónn hjá flugstöðvardeildinni, í samtali við mbl.is.

Frétt af mbl.is

Bólusetningarvottorð fyrir flugferðir

Bólusetningarvottorðið kom frá Danmörku, en eins og fjallað hefur verið um gengur bólusetning rösklega í Danmörku. Þar hafa 183.606 hafið bólusetningarferlið, eða 3,15% dönsku þjóðarinnar, og 32.522 fengið síðari skammtinn, eða 0,52%.

402 vottorð samþykkt en 59 hafnað

Á Keflavíkurflugvelli er einnig tekið við mótefnavottorðum, en alls hafa 402 slík vottorð verið samþykkt af lögregluþjónum og landamæravörðum á Keflavíkurflugvelli frá áramótum. Alls hefur 59 vottorðum verið hafnað, þá ýmist á grundvelli tungumáls, en aðeins er tekið við vottorðum á íslensku, ensku og Norðurlandamálunum, utan finnsku, eða þá að þau hafa verið gefin út utan evrópska efnahagssvæðisins. Þá hefur vottorðum um neikvætt kórónuveirupróf verið hafnað.

Frétt af mbl.is

Skimun á landamærum skylda

Vart hefur orðið við það að fólk reyni að framvísa fölsuðum vottorðum erlendis, en Sigurgeir segir að ekki hafi orðið vart við slíkt á Keflavíkurflugvelli. Hann segir lögregluþjóna þaulvana því að skoða skilríki með tilliti til fölsunar. Auk þess telur hann það varla áhættunnar virði að framvísa fölsuðu vottorði þar sem ókeypis sýnataka sé í boði á landamærum Íslands.