Krefst aðgerða ráðherra vegna skæðrar fuglaflensu

Matvælastofnun hyggst leggja til við ráðherra að fyrirskipa hertar sóttvarnir frá miðjum febrúar vegna skæðrar fuglaflensu sem heldur áfram að breiðast út víða um heim, meðal annars í Evrópu. Er það mat stofnunarinnar að fuglaeigendur þurfi að undirbúa sig undir hertar reglar um sóttvarnir því afleiðingar smits á stórum alifuglabúum geti verið mjög alvarlegar.

Þetta kemur fram í tilkynningu frá Matvælastofnun. Þar segir að afbrigði fuglaflensuveiru með mikla meinvirkni hafi fundist í fjölmörgum villtum fuglategundum í Evrópu síðustu mánuði og að veiran hafi jafnframt borist inn í alifuglabú. Þetta eigi meðal annars við í löndum þar sem farfuglar hafa vetursetu eða viðkomu á leið til Íslands.

Gæti þurft að aflífa tugi þúsunda fugla

Ef skæð fuglaflensa greinist í alifuglum eða öðrum fuglum í haldi mun Matvælastofnun leggja til við ráðherra að fyrirskipa aflífun á öllum fuglum á viðkomandi stað til að hindra útbreiðslu veirunnar. Á stærstu alifuglabúunum hér á landi eru tugir þúsunda fugla og því ljóst að tjónið yrði mikið.

„Í ljósi þessa er talin töluverð hætta á að veiran berist hingað. Fyrstu farfuglarnir koma um og upp úr miðjum febrúar og því mikilvægt að fuglaeigendur undirbúi sig undir að verja fuglana sína eins og kostur er. Ef veiran berst inn á alifuglabú og aðra staði þar sem fuglar eru haldnir getur fjöldi fugla drepist og óhjákvæmilegt verður að aflífa alla aðra fugla á viðkomandi stöðum til að hindra útbreiðslu veirunnar. Smithætta fyrir fólk er talin mjög lítil en þrátt fyrir það er ávallt rétt að gæta smitvarna við handfjötlun á veikum og dauðum fuglum,“ varar Matvælastofnun við.

Nauðsynlegt að grípa til lágmarksaðgerða

Að mati stofnunarinnar verður að grípa til hertra aðgerða og leggur til þær aðgerðir sem þarf að minnsta kosti að ráðast í:

• Að fuglaeigendur hafi fugla sína í húsum eða yfirbyggðum gerðum.
• Að aðskilnaður milli alifugla og villtra fugla verði tryggður.
• Að ekkert í umhverfi fuglahúsa laði að villta fugla.
• Að fóður og drykkjarvatn alifugla sé ekki aðgengilegt villtum fuglum.
• Að endur og gæsir séu aðskildar frá hænsnfuglum.
• Að góðar smitvarnir séu við vatnsból.
• Að hattar séu á öllum lóðréttum loftræstitúðum og fuglanet fyrir öðrum loftræstitúðum, opum og gluggum.
• Að óviðkomandi fólki verði bannaður aðgangur.
• Að notaður verði hlífðarfatnaður í fuglahúsunum sem eingöngu er notaður þar.
• Að hendur séu þvegnar með sápu og vatni fyrir og eftir umhirðu fuglanna.
• Að ekki séu teknir inn fuglar nema frá stöðum sem staðfest er að heilsufar sé gott.
• Sýningarhald og aðrar samkomur með fugla munu verða bannaðar.

Fuglaeigendur sem verða varir við sjúkdómseinkenni, aukin dauðsföll eða minnkun í áti skulu tafarlaust hafa samband við eigin dýralækni eða Matvælastofnun, sérgreinadýralækni alifugla eða héraðsdýralækni.

Almenningur er beðinn um að tilkynna til Matvælastofnunar ef villtir dauðir fuglar finnast, nema augljóst sé að þeir hafi drepist af slysförum. Best er að tilkynna með því að skrá ábendingu á vef stofnunarinnar, en líka er hægt að hringja í síma 530-4800 á opnunartíma eða senda tölvupóst á netfangið mast@mast.is.

Nánari upplýsingar um fuglaflensu, viðbúnaðarstig og fleira má finna á vef Matvælastofnunar.

• Blogga um frétt