Oddafélagið stefnir að því að byggja nýja Oddakirkju og menningar- og fræðasetrið Sæmundarstofu í Odda á Rangárvöllum.
Þessi mannvirki og starfsemi í þeim verði menningarmiðja á þessu merkasta höfuðbóli Suðurlands þar sem rúmlega þúsund ára sögu staðarins og íbúa hans verði gerð skil.
Stjórn Oddafélagsins telur ekki eftir neinu að bíða að taka fyrstu skóflustunguna í ljósi þess að eftir aðeins tólf ár verður 900 ára ártíðar Sæmundar fróða minnst, að því er fram kemur í Morgunblaðinu í dag.
„Þetta er óskaplega spennandi viðfangsefni. Það sameinar margt sem ég hef brennandi áhuga á og ég vil leggja mig fram um að koma á framfæri,“ segir Friðrik Erlingsson, rithöfundur á Hvolsvelli, sem ráðinn hefur verið verkefnastjóri Oddafélagsins. Hann hefur setið í stjórn félagsins um árabil og tekið þar þátt í þeim undirbúningi sem fram hefur farið vegna fyrirhugaðrar uppbyggingar í Odda.