Ísland er með öruggustu löndum Evrópu samkvæmt glæpavísitölu Numbeo. Aðeins fjögur lönd af 40 öðrum Evrópulöndum eru talin lausari við glæpi. Sæti Íslands í röðinni er óbreytt frá vísitölunni í fyrra.
Athygli vekur að Svíþjóð sker sig úr hópi Norðurlanda og er í 4. sæti í Evrópu hvað glæpi varðar. Fer ástandið þar þó lítillega skánandi, en í fyrra var Svíþjóð í 2. sæti og þar á undan í efsta sæti.
Finnland, Danmörk og Noregur þykja mun öruggari, en þó er ástandið í Noregi ögn lakara en hjá hinum.
Meðal annarra granna okkar eru Bretar og Írar meðal þeirra landa þar sem glæpir þykja mestir. Frakkland er í 2. sæti listans, aðeins á eftir Hvíta-Rússlandi þar sem glæpir eru taldir mestir í Evrópu, að því er fram kemur í Morgunblaðinu í dag.