„Atburði gærdagsins er lokið,“ segir Elísabet Pálmadóttir, náttúruvársérfræðingur á Veðurstofu Íslands. Hún sat fund vísindaráðs Almannavarna nú síðdegis þar sem meðal annars var rýnt í gervitunglamynd sem tekin var í gær.

Elísabet segir að myndin, sem tekin var eftir óróapúlsinn við Keili um miðjan daginn í gær, sýni ekki mikla breytingu frá síðustu mynd sem tekin var fyrsta dag mánaðarins. 

„Myndirnar benda enn þá til þess að það sé berggangur með norðaustur/suðvestur stefnu og hugsanlega að við atburðinn í gær hafi ekki verið mikið af kviku á grynni á ferð,“ segir Elísabet.

Hún bendir á að ummerki um óróapúls gærdagsins hafi ekki verið mjög sjáanleg á nýju gervitunglamyndunum. Því geti ekki hafa verið mikið af kviku nálægt yfirborði jarðar.

Elísabet bendir á að órói gærdagsins sjáist ekki lengur, en við séum enn stödd í kröftugri jarðskjálftahrinu.

Skjálftahrinan virðist færast suðvestur, í átt að Fagradalsfjalli. Elísabet segir ekki að það þurfi að þýða neitt sérstakt annað en spennubreytingu.

Tengdar fréttir

Eldvirkni á Reykjanesskaga

Duster-bifreiðin farin úr hrauninu

• Ný mynd sýnir hvernig enn gýs úr gígnum
• Lánastofnanir þurfa að koma að borðinu
• Myndskeið: Elduðu pylsur við eldgosið
• „Þetta er pínu óvanaleg staða“

» Fleiri tengdar fréttir

• 1 blogg um fréttina

Bloggað um fréttina

• Torfi Kristján Stefánsson: Ekkert gos?