Alls hafa borist tæpar 9.000 endurgreiðslubeiðnir á virðisaukaskatti vegna vinnu iðnaðarmanna við endurbætur og viðhald á fyrstu tveimur mánuðum ársins. Í fyrra bárust 45.000 endurgreiðslubeiðnir og árið 2019 tæplega 12.000. Endurgreiðslur á fyrstu tveimur mánuðum ársins 2021 námu alls 130 milljónum króna. Alls hafa þegar verið afgreiddar 1.500 endurgreiðslubeiðnir vegna 2021.

„Það stefnir í metár í framkvæmdum hér á landi ef heldur fram sem horfir. Iðnaðarmenn hafa haft nóg að gera enda sjá margir tækifæri að láta gera við húsnæði og bifreiðar og fá virðisaukaskattinn endurgreiddan. Endurgreiðslan var tímabundið hækkuð úr 60 prósent í 100 prósent til að bregðast við niðursveiflu í efnahagslífinu af völdum Covid-19,“ segir Hilmar Harðarson, formaður Samiðnar, Sambands iðnfélaga, í fréttatilkynningu. 

„Ákveðið var að hækka endurgreiðsluhlutfall vegna vinnu við íbúðarhúsnæði fram til ársloka 2021, og víkka út þá heimild þannig að hún taki m.a. einnig til húsnæðis í eigu sveitarfélaga og bílaviðgerða. Við hjá Samiðn lögðum mikla áherslu á þetta átak enda er það atvinnuskapandi og einnig mikilvægt út frá neytendasjónarmiðum enda tryggir það enn frekar að leitað sé til fagmanna sem er mikið kappsmál allra, hefur skilað okkar félagsmönnum aukinni vinnu og verkefnum á þessum erfiðu tímum. Á sama tíma lækkar átakið kostnað almennings en það er mikilvægt að hann geti leitað til fagmanna varðandi byggingarframkvæmdir og bílaviðgerðir og hins vegar verndar það mikilvæg störf í iðngreinum,” segir Hilmar enn fremur í tilkynningu.

Búið er að endurgreiða samtals rúmlega 12,2 milljarða vegna vinnu sem framkvæmd var frá mars til áramóta 2020 samkvæmt upplýsingum frá skattinum en alls nemur fjöldi afgreiddra endurgreiðslubeiðna vegna tímabilsins rúmlega 40.000 á fyrstu 9 mánuðum 2020 að því er segir í fréttatilkynningu frá Samiðn.

Um 4,2 milljarðar voru endurgreiddir vegna endurbóta og viðhalds á íbúðarhúsnæði á tímabilinu, 1,7 milljarðar vegna nýbyggingar á íbúðarhúsnæði og endurgreiðsla til byggingaraðila nam 5,6 milljörðum. Endurgreiðslur vegna bifreiðaviðgerða námu 264 milljónum. Endurgreiðslur til líknarfélaga námu tæpum 92 milljónum og endurgreiðslur til sveitarfélaga 295 milljónum.

Tengdar fréttir

Kórónukreppan

Áfangaheimilinu lokað ef ekki er gripið inn í

• „Þetta er allt saman á fleygiferð“
• Of harðar aðgerðir í faraldrinum
• Sjá fram á minna atvinnuleysi
• „Það er best að hafa samræmi í þessu“

» Fleiri tengdar fréttir

• Blogga um frétt