Róbert Marshall er kominn í launalaust leyfi frá störfum fyrir ríkisstjórnina og orðinn formlegur frambjóðandi í forvali VG í Suðurkjördæmi sem fram fer 10.-12. apríl.
Þetta kemur fram í færslu hans á Facebook en þar segir hann verkefnið fram undan að tala fyrir náttúruvernd, umhverfismálum, grænni uppbyggingu atvinnulífs og félagslegu réttlæti í krefjandi framtíð.
Nokkrir hafa gefið kost á sér til að skipa efsta sætið í kjördæminu en Ari Trausti Guðmundson sem skipaði það sæti við síðustu þingkosningar gefur ekki kost á sér til endurkjörs.
Auk Róberts hafa Kolbeinn Óttarsson Proppé, þingmaður Reykjavíkurkjördæmis suður, Heiða Guðný Ásgeirsdóttir, bóndi og sveitarstjórnarkona, Almar Sigurðsson, eigandi gistiheimilisins á Lambastöðum, og Hólmfríður Árnadóttir gefið kost á sér til að leiða listann.