Verulegar tafir á mati

Verkefnisstjórn vegna fjórða áfanga rammaáætlunar hefur lagt til að níu virkjunarkostir fari í nýtingarflokk. Þrír þeirra eru innan miðhálendisins, nánar tiltekið fyrirhuguð stækkun Vatnsfells-, Sigöldu- og Hrauneyjafossstöðvar.

Gert er ráð fyrir að stækkanirnar á Þjórsársvæðinu í Ásahreppi skili um 210 MW. Þá er einnig lagt til að tvær virkjanir á Vestfjörðum verði settar í nýtingarflokk: 12 MW Hvanneyrardalsvirkjun og 13,7 MW Tröllárvirkjun. Auk þess er lagt til að samþykkt verði stækkun Svartsengis og þrjú vindorkuver rísi í Reykhólahreppi, Borgarbyggð og Hörgárbyggð.

Aðeins voru afgreiddir 13 virkjunarkostir sökum þess að miklar tafir urðu á afgreiðslu mála, þar sem Alþingi hefur enn ekki afgreitt þriðja áfanga rammaáætlunar. Það gerði það að verkum að Orkustofnun auglýsti ekki eftir virkjunarkostum í tvö ár.

Í umfjöllun um mál þetta í Morgunblaðinu í dag segir Bergþór Ólason, formaður umhverfis- og samgöngunefndar Alþingis, segir stöðuna á ábyrgð Guðmundar Inga Guðbrandssonar, umhverfis- og auðlindaráðherra.