Innlent | mbl | 13.4.2021 | 14:37 | Uppfært 16:02

Hraun renni á endanum yfir gönguleið

Jarðfræðingurinn Þóra Björg Andrésdóttir var á svæðinu í morgun þegar ný sprunga myndaðist. Ljómynd/Þóra Björg

Gossvæðið í Geldingadölum tekur stöðugum breytingum en í morgun opnuðust fjórir nýir gígar, eða ein samfelld 100 metra sprunga. Hraun rennur nálægt annarri gönguleiðinni að gosstöðvunum og mun, með sama áframhaldi, renna yfir endann á henni.

Uppfært kl. 15:55: Í upphaflegu útgáfu fréttarinnar var haft eftir lögreglunni á Suðurnesjum að hraun hefði runnið yfir endann á gönguleið A. Samkvæmt upplýsingum úr aðgerðastjórn virtist hraunið vera á leið yfir gönguleiðina en hefur ekki náð þangað enn, þó það muni ná því á endanum.

Gönguleiðir A og B eru báðar opnar, þar sem fólk getur borið nýja sprungu augum.

Á kortinu má sjá gönguleiðir A og B. Ath. að myndin er frá því á laugardaginn og nýju gosopin og hraunið frá þeim kemur ekki fram á myndinni. Ljósmynd/Jarðvísindastofnun

Hjálmar Hallgrímsson, vettvangsstjóri hjá lögreglunni á Suðurnesjum, segir eitthvað af fólki á svæðinu og býst við fjölda síðdegis enda veðrið gott og margir spenntir að sjá breytingarnar á svæðinu:

„Um leið og það opnast ný sprunga þurfa allir að koma aftur,“ segir Hjálmar og hlær.

Frétt af mbl.is

„Náttúran ræður hérna á Íslandi“

Eins og áður hefur komið fram er nýja sprungan inni á áður skilgreindu hættusvæði en það er þar sem fólk getur verið í bráðri hættu vegna skyndilegra atburða sem geta orðið á gosstöðvum. Innan hættusvæðisins er allra mesta hættan á opnun fleiri gossprungna án fyrirvara og því getur fylgt skyndilegt og hratt hraunflæði sem erfitt er að forðast. Utan þessa svæðis eru einnig aðrar hættur sem fylgja framrás hrauns og uppsöfnun gass.

Hjálmar segir svæðið öruggt og það væri búið að loka ef það væri ekki talið öruggt. Viðbragðsaðilar séu stöðugt að endurmeta stöðuna og loki með skömmum fyrirvara ef ekki er talið öruggt að vera á gosstöðvunum af einhverjum ástæðum.