Gert er ráð fyrir að gossvæðið verði opnað aftur á morgun, gangi veðurspá eftir, að sögn Gunnars Schram, yfirlögregluþjóns hjá lögreglunni á Suðurnesjum.
Gossvæðið var rýmt í gærkvöldi og verður lokað í dag vegna veðurs. Hann segir rýmingu hafa gengið vel og fólk hafi virt lokunina hingað til „enda veðrið kannski óspennandi“.
Ákvörðun um hvenær svæðið verður opnað verður tekin síðdegis í dag en sem fyrr segir segist Gunnar gera ráð fyrir að það verði opið á morgun.
„Ef veðurspáin stenst þá verður blautt á gossvæðinu á morgun en ekki þessi óhemjurigning og vindur. Það er bara úrhelli,“ segir Gunnar. Fram kom í tilkynningu frá almannavörnum í gær að við veðuraðstæður eins og búast má við í dag verði allar leiðir, hvort heldur er gönguleiðir eða neyðarvegur viðbragðsaðila, eitt forarsvað.
„Á stað eins og þessum, þar sem eru moldar- og malarstígar og akvegur viðbragðsaðila er nú illfær fyrir, eru ekki aðstæður til útivistar í dag.“