Viðgerð á húsi OR kosti um 2 milljarða

Matsmenn sem fengnir voru til að meta galla á vesturbyggingu höfuðstöðva Orkuveitu Reykjavíkur benda á að gallarnir hafi komið í ljós skömmu eftir að húsið var vígt á vormánuðum 2003. Um það vitni skriflegar heimildir frá 2004.

Matsmennirnir gagnrýna ýmsa þætti í framkvæmdinni. Meðal annars hafi gluggakerfi frá dönskum framleiðanda ekki verið prófað í samræmi við verklýsingu.

Þá er gagnrýnt að framleiðandi gluggakerfisins skuli ekki hafa komið að síðustu viðgerðinni á byggingunni á árunum 2015-2016.

Telja þeir fullreynt að gera við vesturbygginguna. Úrbætur muni kosta ríflega 1,9 milljarða, að því er fram kemur í umfjöllun um mál þetta í Morgunblaðinu í dag.