Dæmi um að 34 tonn hafi verið fjarlægð í einni hreinsun

Hreinsitækni hefur hafið vorhreinsun og þrif á götum og gangstígum í Reykjavík, Kópavogi, Garðabæ og Mosfellsbæ. Á þriðja tug vélsópa og vatnsbíla eru nú þegar að störfum.

Í fyrstu umferð eru sópaðar og þrifnar stofnbrautir og göngustígar. Síðar verða húsagötur teknar og mun Hreinsitækni auglýsa með áberandi merkingum og skiltum áður en farið verður inn í hvert hverfi fyrir sig. Merkingarnar eru ekki síst til að óska eftir því að ökutæki verði sem minnst í vegi fyrir sópum og vatnsbílum. Með því gengur verkið hraðar og árangurinn verður betri, að því er segir í tilkynningu. 

„Við erum á fullu í Breiðholtinu núna í Reykjavík og einnig byrjaðir í Mosfellsbæ, Kópavogi og Garðabæ. Þetta er mikill annatími hjá okkur og við stefnum á að klára þessi sveitarfélög í lok maí. Frostakaflinn í byrjun mánaðar setti smá strik í reikninginn en við erum fljótir að vinna það upp,“ segir Björgvin Jón Bjarnason, framkvæmdastjóri Hreinsitækni, í tilkynningunni. 

Þá segir að að mörg hundruð tonn af lausu efni séu fjarlægð af götum og gangstígum með þessu móti. Dæmi séu um að á einni af fjölförnustu götum höfuðborgarsvæðisins hafi 34 tonn af ryki, möl og sandi verið fjarlægð í einni hreinsun.

„Við vitum að sópun og þrif er árangursrík aðferð til að auka loftgæði og minnka svifryk. Það er okkar trú að þegar við verðum búin að þrífa muni það ekki bara sjást heldur einnig finnast á betra lofti og betri loftgæðum,“ segir hann enn fremur í tilkynningu. 

• Blogga um frétt