Skjálfti upp á 4,1 og aukin virkni

Áhugafólk veltir því fyrir sér hvort nýr gígur hafi opnast …
Áhugafólk veltir því fyrir sér hvort nýr gígur hafi opnast í Geldingadölum, lengst til hægri frá sjónarhorni vefmyndavélar mbl.is. Skjáskot/Vefmyndavél mbl.is

Jarðskjálfti af stærðinni 4,1 mældist klukkan 23:05 í kvöld um þrjá kílómetra norðaustur af fjallinu Þorbirni.

Í tilkynningu frá Veðurstofu Íslands segir að skjálftinn hafi fundist víða á Suðvestur-, Suður- og Vesturlandi, allt austur á Hellu og norður í Grundarfjörð. Nokkrir eftirskjálftar hafa fylgt í kjölfarið.

Þetta er stærsti skjálfti sem mælst hefur á Reykjanesskaga síðan 15. mars eða frá því áður en gos hófst.

Þá telur áhugafólk um eldgosið í Geldingadölum, í facebook-hópnum Jarðsöguvinir, sig hafa séð nýjan gíg opnast á gosstöðvunum.

Salóme Jórunn Bernharðsdóttir, náttúruvársérfræðingur á Veðurstofu Íslands, er þó ekki tilbúin að staðfesta að nýr gígur hafi opnast og telur líklegt að um sé að ræða aukinn kraft í gíg sem opnaðist á laugardaginn var. 

Sjá má aukinn kraft úr gíg sem sést lengst til hægri á vefmyndavél mbl.is en talið er að nýi gígurinn hafi opnast fyrir aftan nyrsta gíginn eða lengst til hægri frá sjónarhorni vefmyndavélar mbl.is.

mbl.is

Bloggað um fréttina