Þórólfur sáttur við aðgerðir stjórnvalda

Þórólfur Guðnason sóttvarnalæknir sagði, í Kastljósi kvöldsins, að fréttir dagsins slái sig bara ágætlega. Sem kunnugt er boðaði ríkisstjórnin fyrr í dag hertar aðgerðir á landamærum.

„Ég hef nú ekki séð endanleg drög að frumvarpi en þetta slær mig bara ágætlega og í takt við það sem ég hef verið að tala um og mitt ákall til stjórnvalda um að fá heimildir til þess að geta sett fólk í sóttvarnahús þar sem smit eru mjög há. Mér sýnist þetta vera í takt við það,“ sagði Þórólfur.

Frétt af mbl.is

Hertar aðgerðir hjá löndum með hærra nýgengi smita

Þá sagðist Þórólfur halda að tillögurnar væru nægilega róttækar en að við ættum enn eftir að sjá útfærsluna.

Eitt af því sem boðað var á fundinum í dag var að dómsmálaráðherra fengi heimild til að banna ónauðsynlegar ferðir frá löndum þar sem nýgengi smita er umfram 1.000 á hverja 100 þúsund íbúa.

Þórólfur sagði það gott að hægt væri að grípa til slíkra aðgerða ef virkileg útbreiðsla yrði í einhverju landi af nýju afbrigði. Hann benti þó á að um örþrifaráð væri að ræða og hann sæi ekki fyrir sér að oft yrði gripið til þessa úrræðis.

Myndi taka AstraZeneca

Í Kastljósi ræddi Þórólfur einnig um bóluefni og bólusetningar. Þórólfur býst við því að fá bráðlega boð í bólusetningu, aldurs síns vegna. En hann hefur í tvígang verið boðaður í bólusetningu sem heilbrigðisstarfsmaður og neitað.

„Býst við að ég fái AstraZeneca og ég myndi taka það,“ sagði Þórólfur.

• 1 blogg um fréttina

Bloggað um fréttina

• Ómar Geirsson: Þórólfur er alltaf sáttur.