Tveggja stafa hitatölur í vændum

Kort/Veðurstofa Íslands

Veðurútlit næstu daga er fremur rólegt, hægar suðlægar átt og þokkalega milt. Spáin gerir ráð fyrir allt að 13 stiga hita á föstudag og laugardag. 

„Loftið sem kemur upp að landinu er í rakari kantinum og því viðbúið að áveðurs verði skýjað að mestu og einhver smá væta, rigning eða súld af og til. Á austanverðu landinu verður lengst af þurrara. Þegar vindur er svona hægur ná hlýindin að takmörkuðu leyti norður yfir heiðar en allmennt má reikna með 2 til 7 stiga hita að deginum. Ef léttir til að næturlagi er hins vegar líklegt að frysti,“ segir í hugleiðingum veðurfræðings á Veðurstofu Íslands.

Veðurhorfur í dag og næstu daga

Sunnan og suðvestan 5-10 í dag, skýjað og dálítil væta, en þurrt að kalla suðaustan- og austanlands. Hiti 2 til 8 stig yfir daginn.

Sunnan og suðaustan 5-13 á morgun, hvassast SV-til. Rigning um landið V-vert , en annars hægari og úrkomulítið. Hiti 4 til 10 stig.

Á fimmtudag (sumardagurinn fyrsti):
Suðaustlæg átt 5-13 m/s og rigning vestan til á landinu en hægviðri og að mestu þurrt austantil. Hiti 2 til 7 stig.

Á föstudag:
Suðlæg átt 5-10 og dálítil væta en skýjað með köflum og þurrt fyrir austan. Hiti 5 til 13 stig.

Á laugardag:
Fremur hæg austlæg átt, skýjað með köflum og víða þurrt en fer að rigna sunnan til um kvöldið. Hiti 8 til 13 stig.

Á sunnudag og mánudag:
Norðaustlæg átt. Skýjað og sums staðar dálítil væta og kólnar, einkum N-til.

Á þriðjudag:
Útlit fyrir norðaustanátt, rigning syðra en snjókoma eða slydda fyrir norðan. Hiti 0 til 7 stig, mildast S-lands.

mbl.is
Fleira áhugavert
Fleira áhugavert