Nú er heimilt að skylda ferðamenn í sóttvarnahús

Heilbrigðisráðherra hefur nú heimild til þess að skylda ákveðna ferðamenn …
Heilbrigðisráðherra hefur nú heimild til þess að skylda ákveðna ferðamenn í sóttvarnahús, að fenginni tillögu frá sóttvarnalækni. Hér eru Svandís Svavarsdóttir heilbrigðisráðherra og Þórólfur Guðnason sóttvarnalæknir. Eggert Jóhannesson

Frumvarp heilbrigðisráðherra um sóttvarnalög og lög um útlendinga var samþykkt um klukkan hálffimm í morgun, með 28 atkvæðum gegn tveimur. Á meðal þeirra sem greiddu atkvæði gegn frumvarpinu var stjórnarþingmaðurinn Sigríður Á. Andersen. 22 sátu hjá og 11 voru fjarverandi.

Lögin heimila ráðherra frá og með deginum í dag, 22. apríl, og til 30. júní nk. að skylda ferðamenn sem koma frá eða hafa dvalið á hááhættusvæðum eða svæðum sem fullnægjandi upplýsingar liggja ekki fyrir um til að sæta sinni sóttkví eða einangrun í sóttvarnahúsi.

Samþykkt með breytingatillögu

Sóttvarnalækni er heimilt að veita undanþágu frá þessari skyldu sýni ferðamaður með fullnægjandi hætti fram á að hann muni uppfylla öll skilyrði sóttkvíar eða einangrunar í húsnæði á eigin vegum,“ segir í nýsamþykktum lögum.

Frumvarpið var samþykkt með breytingartillögu minnihlutans en fjórir af fimm stjórnarþingmönnum í velferðarnefnd undirrituðu minnihlutaálitið. Tillagan inniheldur breytingar á orðalagi og gefur ráðherra umboð til þess að skilgreina hááhættusvæði að fenginni tillögu sóttvarnalæknis.

mbl.is

Bloggað um fréttina

Fleira áhugavert
Fleira áhugavert